ആരുടെയും സ്വന്തമല്ലാത്തവര്‍..

ഇത് എന്റെ പൊന്നുമക്കള്‍.. ഈശോയുടെ പിഞ്ചോമനകള്‍. ‍.ആരുടെയും സ്വന്തമല്ലാത്താത്ത കുരുന്നുകള്‍..പൈതൃകങ്ങളോ പാരമ്പര്യങ്ങളോ,കുലകുടുമ്പ മഹിമകളോ ഒന്നും അവകാശപ്പെടാനില്ലാത്തവര്‍...ഞാന്‍ നിയമം വഴി സ്വന്തമാക്കിയ കുഞ്ഞുമകളുടെ സഹോദരങ്ങള്.കുപ്പത്തൊട്ടിയിലോ, കുളിപ്പുരകളിലോ,കുറ്റിക്കാടുകളിലോ ജന്മം നല്‍കിയവര്‍ക്കു വേണ്ടാതെ ഉപേക്ഷിക്കപ്പെട്ടവര്‍..എന്നിരുന്നാലും അവരെത്രയോ ഭേദപ്പെട്ട അമ്മമാര്‍, നശിപ്പിച്ചു കളയാതെ ജീവിക്കാനനുവദിച്ചുവല്ലോ. അതുതന്നെ അവരുടെ വലിയ മഹത്വം. അവരുടെ കാരുണ്യം..ഭ്രൂണഹത്യയില്‍ ഒന്നാം സ്ഥാനത്താണ് സാക്ഷരസുന്ദര കേരളമെന്ന കണക്കുകള്‍ ഭാരപ്പെടുത്തുന്നു..

തങ്ങളുടെ മക്കള്‍ക്ക് കൊടുക്കുന്നത് പോരാ പോരായെന്ന് ഓരോ മാതാപിതാക്കളും കരുതുമ്പോള്‍ ഈ കുഞ്ഞുങ്ങളാകട്ടെ ഒരു പ്രത്യേകതകളും ഇല്ലാതെ ശൈശവത്തിന്റെ പരിലാളനകള്‍ അത്രയൊന്നും ലഭിക്കാതെ കൂട്ടങ്ങള്‍ക്കിടയില്‍ ഈ കുഞ്ഞുങ്ങളും വളരുന്നു, വലുതാകുന്നു...ഭാഗ്യമുള്ളവര്‍ ഏതെങ്കിലും അപ്പനുമമ്മയ്ക്കും സ്വന്തമാകും..അല്ലാത്തവര്‍ക്ക് അഛനും അമ്മയും ഇവരുടെ പോറ്റമ്മമാര്‍..പിന്നെ ഈശ്വരനും തുണ..

ആദ്യകാലങ്ങളില്‍ ഞാനോര്‍ക്കുന്നു, അഞ്ചു മാസമായിട്ടും കുഞ്ഞിന് അതിന്റെ സ്വാഭാവികമായ ചിരികളികള്‍ പോലുമുണ്ടായിരുന്നില്ല..വെറും നിലത്തു കിടത്തിയാലും അവിടെ കിടന്നുറങ്ങിക്കൊള്ളൂം..വിശന്നാല്‍ മാത്രം ചെറുതായി കരയും..പിന്നെയും തനിച്ച് കിടന്നോളും...പരുക്കനിടങ്ങളീല്‍ അതിലാളനകളീല്ലാതെ, ഒറ്റയായ പരിഗണനകള്‍ ഇല്ലാതെയും ജീവിക്കാന്‍, ചെറുതിലേ ഈ കുഞ്ഞുങ്ങളും ശീലിക്കുന്നു..നിലത്തുവീണാലും, വാശിപിടിച്ചാലും എടുത്തുയര്‍ത്താന്‍ ഒരു കരം അടുത്തുണ്ടാവില്ല എന്ന് തിരിച്ചറിയുന്നവര്‍ കരയാറില്ലല്ലോ..അതിജീവനത്തിന്റെ പാഠങ്ങള്‍ ഈ കുഞ്ഞുങ്ങള്‍ പഠിപ്പിച്ചു തന്നു..

ഇവരെ കൂടാതെയെന്‍ മകള്‍ക്കൊരാഘോഷവും വേണ്ട.
ഇവരെയോര്‍ക്കാതെ ഞങ്ങള്‍ക്കൊരുത്സവവും വേണ്ട.